前两天，和几个朋友一起吃饭。都是各种球迷。这是自过年以来第一次在外面吃饭。

　　A：娄啊，前两天看到新闻里讲德国联赛准备复工啦？讲是5月9日就可以全面恢复？

　　B：还弗止德甲来，讲英超、西甲也准备6月初恢复。我本来前两天就想打电话问侬呃，阿拉利物浦额冠军奖杯到底捞得着伐？正好今朝吃饭一道问。

　　C：我还看到欧足联额新闻，讲本赛季欧冠要摆到8月再恢复。迭能介勿是要影响到下个赛季去了？

　　我笑：三位兄弟阿是实在等得来吃勿消了，是伐？弗瞒侬讲，我另外一个朋友，心里厢还要急来，前两个礼拜几乎是看到一条新闻就要打只电话过来问我。弄得来我像是电台里厢个《听众热线》一样。

　　C：哦，对呃对呃，侬蹲了《东方体育日报》廊厢写个专栏文章写到过呃，就是伊啊？我看了穷笑。

　　我：不过，闲话讲转来，阿拉急，人家欧足联啦，五大联赛啦，实实叫比阿拉还要急来。真个假使本赛季勿能正常结束个闲话，相关产业链个损失是勿得了。

　　A：各么阿拉前头问侬个，五大联赛5、6月份恢复，到底来噻伐啦？

　　我：我觉着现在透露出来个方案侪是按照理想状态做出来呃。也就是讲，预计欧洲迭眼国家个疫情嘞嗨接下去一个号头里厢基本结束，老百姓个生活基本恢复正常。但是，各个国家个情况又有弗一样，上个礼拜比利时联赛就宣布本赛季踢勿下去了，就此结束。今朝最新个消息讲荷兰联赛也宣布提前结束了，冠军到底是啥人也勿晓得。所以，我觉着变数还是老老大额......

　　B：迭能看来，欧足联面对疫情反应还是算蛮快呃咯？直接把今年个欧锦赛推迟到明年？

　　我：是呀。欧足联把欧锦赛推迟到明年，客观廊厢为五大联赛把辰光侪空出来了。否则等到疫情结束大家就要挤成一桌堆，联赛欧冠欧锦赛，迭个复工个计划更加呒没办法弄来。

　　A：各么，假使影响到了下个赛季呢？勿是也老尴尬啦？

　　我：迭个就呒没办法来！我帮伊拉算过一算。假使5月份就能复工，各么联赛也好，杯赛也好，欧冠欧联也好，基本廊厢到7月底侪好结束忒，对下个赛季应该是影响最小。假使要等到6月份甚至于7月份再复工，各么下个赛季个开始辰光就要受影响了。

　　C：娄，侬个意思是上下两个赛季要变成无缝链接？

　　我：无缝链接算是小事体来！最极端个状况是啥？因为欧锦赛现在已经摆到明年6月份举行了，也就是讲下一个赛季必须嘞嗨明年5月中结束，所以假使下个赛季弗能嘞嗨8月份正常开始个说话，各么到今年年底侬就会得看到欧洲五大联赛连得冬休期也呒得来！圣诞节勿放假，全部帮我到球场廊去踢比赛！

　　三人大笑，异口同声：迭个倒也好呃，阿拉球迷呒没啥意见，只要有得球好看，踢煞忒伊拉......